Чачан республикаялъул бетIерасдаги Хасавюрт шагьаралъул нухмалъулесдаги гьоркьоб байбихьана гъалмагъир. Рамзан Къадировас Хасавюрталъул мэр Сайгидпаша ГIумаханов ва гьесул гIага-бажарал, киналгIаги далил рачинчIого, лъазаруна хъачагълъиялде хурхен бугел гIадамаллъун. ГьанжелъезегIан щай гьелъул "балъголъи" гьес гьабулеб букIарабали, лъицаниги баянлъизабулеб гьечIо. Къадировасул лъазабиялда нахъ цо-цо экспертазда бихьулеб буго, мадугьалиял территориязде жиндирго асар тIибитIизе гьесул ругел анищазда.
